Ghirmay Solomon

4 February 2019

ኣርባዕተ ፊደላ ዶ ኣርባዕተ ነጥባ -ስነ ጥበበኛ ግርማይ ሰለሙን
ተረካብ ዘረባ፣ ብሉጽ ተውህቦ ውሑዳት ሰባት ኢዩ። ልሳናውያን ብእኡ ንብኡ ኢዩ ልክዕ ዝምልሱ፣ ዝገልጹ። ብብዙሕ ተወክሎታት ክምሰሉ ይኽእሉ። ንመስታ ዘርክቡ ወይ’ውን ከምዚ ኣመጋግባ ዓሳ ኣብ ገምገም ባሕሪ፣ ጅልብ ጥብስ ቅርብ። መልሲ ኣብ ደረት ከናፍሮም ክብሃሉ ይስምዑ። ምስ ቋሕ ሰም ዘመሳስልዎም’ውን ውሑዳት ኣይኮኑን። እቲ ካብ ቅልጣፈ እቲ ልክዕ መልሲ ብልጸት የውህቦም።
ኩሉ ሰብ ብዝገርም ቅልጣፈ ኣፍ ክኸፍት ይኽእል። ልክዕን ማዕቀንን ልሳን ዝውንን ግን ኩሉ ኣይከውንን። ካብዞም ሰብ ፍሉይ ውህበት ሓደ ኣቦና ስነ ጥበበኛ ኣቦና ግርማይ ሰለሙን ኢዮም። ንዝተመርጸ ኣርእስቲ ብዝተላዕለ ጉዳይ፣ ኣብ እንካን ሃባን ፈጣን መላሲ ክህቡ ኣይድንጉዩን። ኣፍ ዘየኽድን ዋዝኦም እቲ ካልእ ጸጋ ወይ ተውህብኦም’ዩ- ንሱ’ውን ንባዕሉ ስነ ጥበብ ኢዩ። ምስ ኣያቶም፣ መዛንኦም ደቆምን ደቂ ደቆምን ሚዛን ገጢሞም ኣብ ዕላል ክሕብሩን ክስምሩን ኣይሽገሩን። ድሕሪ ቃል ዝቕጽል ስሓቕ ዓቢ እቲ መልሶም ዝቕጽል ዛንታ፣ ዘየቋርጽ ዝደጋገም ዕላል፣ እቲ ምሩጽ ቃላት ሓረጋትን ምሉእ ሓሳባትን ከኣ ገዛእቲ ኣርእስቲ ይቕይሮም። ብሓጺሩ ሓደ ካብቶም በሉ ዝበሃለሎም በሃልቲ ነበሩ- ድሮ ዕስራ ሰዓታት ቀሪቡ።
ነውሐ እንተተባህለ ኣብ ስሙን ኣርባዕተ ግዜ ንራኸብ ነበርና። ኣርባዕተ ሳዕ ስሩዕ ቃል መሕተት ኣካዪደሎም። እታ ድሓር ኣብ ራድዮ ኑማ ዝዓደምኩዎም ሰፋሕ ቃል መሕተት ዝያዳ ስሓቢትን ምቅርትን ዝቐየራ ክፉትነት ግሉጽነትን ተራኺ ዕላሎም ነበረት። ብዘይተረፍ ከዕልሉ ዕድል ዝፈጠረት ብልጽቲ ኣጋጣሚ ከኣ ነበረት። ሰማዕቲ ኣብ ስነ ጥበባዊ ጉዕዞኦም፣ ዕለታዊ ህይወቶም ሕማቕን ጽቡቕን ኣጋጣምትን ተጓንፎን ነጊፎም ሓቲቶሞም፣ ብስሓቕን ሸፈፍን ከይሓለፉ ከኣ መሊሶም።
ገጣማይ ዘያማይ ሙዚቀኛን ደራፋይን ነበሩ። ጥበብ ሙዚቃዊ ኣጸዋውትኦም ናይ ገዛእ ርእሶም ኣሰር ዘትርፍ ኢዩ። ገና ብህጻኖም ኢዮም ትዕድልቶም ኣላልዮም። ካብቶም ደቀንስትዮ ጥበብ ሙዚቃ ዝምሃርኦም ስነ ጥበበኛ ኢዮም። ካብ ከተማ ደቀምሓረ ኣስመራ መጺኦም ግዜ ንእስነቶም ኣስተማቒሮም። ኣብ ኣዲስ ኣበባ፣ ሱዳን፣ ጅዳን ዘይርስዑን ዘይሃሱን ስነ ጥበባዊ ፍርያት ኣበርኪቶም። እታ ቀጻሊ እዛ ዓመት ኣይሰግራን እየን ዝበልዋስ ...ኣርባዕተ ነጥቢ! source Memories of the Legends & Tunes of Eritrea Qienit